English (UK) Mae gwaith adeiladu wedi cychwyn ar gynllun £4 miliwn i ddatblygu adeilad Academi Hwylio Pwllheli a fydd yn cwblhau’r pecyn o fuddsoddiadau cyfalaf yn ardal harbwr y dref. 
Mae’r dywarchen gyntaf wedi ei thorri ar safle Academi Hwylio Genedlaethol Cymru ym Mhenrhyn Glan Don, Pwllheli. Bydd yr adeilad yn rhan allweddol o’r pecyn £8.3 miliwn a ddiogelwyd gan Gyngor Gwynedd i gryfhau’r diwydiant morol a hwylio yn lleol.
Mae cynllun yr Academi Hwylio Genedlaethol a Chanolfan Ddigwyddiadau wedi ei gydariannu drwy Gronfa Datblygu Rhanbarthol Ewrop drwy Lywodraeth Cymru a Chyngor Gwynedd.
Bydd yr adeilad eiconig hwn yn ganolfan i gynnal digwyddiadau a chystadleuthau hwylio gyda’r gorau yn y byd. Bydd hefyd yn adnodd canolog i’r gymuned leol ac i’r diwydiant awyr agored ym Mhwllheli a’r ardal gyfagos.
Y cwmni o ogled Cymru, Wynne Construction sydd wedi ennill y gytundeb i gyflawni’r gwaith ac mae disgwyl y bydd adeilad yr Academi yn agor ei drysau yn haf 2015.
Dywedodd y Cynghorydd John Wynn Jones, Aelod Cabinet dros yr Economi ar Gyngor Gwynedd:
“Fel Cyngor, rydym yn ymfalchio yn y cynnig sydd gan Bwllheli ar gyfer y sector hamdden ac awyr agored ac yn gweld fod gan y Academi Hwylio Genedlaethol le hanfodol i gryfhau’r diwydiant hwn er budd yr economi a’r gymuned yn lleol.
“Bydd adeilad yr Academi yn adnodd gwerthfawr i’r gymuned leol – fel canolfan i’r gymuned ei ddefnyddio ac hefyd gyda chyfleusterau o’r radd flaenaf a fydd o fudd i drigolion lleol ac ymwelwyr i’r ardal.”
Ychwanegodd Stephen Tudor, Cadeirydd Plas Heli Cyf, sef y corff gwirfoddol sydd wedi ei sefydlu i reoli’r adnodd:
“Mae hon yn garreg filltir bwysig iawn ac fe welwn flynddoedd o waith yn cael eu gwireddu yma. Mae’r cynllun yn un cyffrous i ddyfodol Pwllheli.
“Yn dilyn misoedd o waith datblygu ac ymgynghori mae’r pecyn o waith sydd ynghlwm a’r cynllun bellach yn ei le, gyda gwaith sylweddol o garthu’r harbwr a gosod angorfeydd newydd eisoes wedi eu gwneud oddi mewn yr harbwr.”
Plas Heli Cyf. Glan y Don, Pwllheli, Gwynedd LL53 5YT